CEBU, Philippines – Usa ka adlaw human siya gikuha isip No. 4 pick sa PBA Rookie Draft niadtong Domingo, ang Sugboanong point guard nga si Paul Desiderio malagpot sa Blackwater dihang gi-trade siya sa NLEX Road Warriors.
Ang kanhi UV Baby Lancers nga si Desiderio wala magdahom nga kuhaon sa NLEX isip No. 4 sunod sa mga sikat nga amateur standouts nga sila ni CJ Perez, Ray Parks Jr. ug Robert Bolick.
Una na nga miingon si coach Yeng Guiao nga gikinahanglan nila ang masaligang point guard sama ni Desiderio, apan nausab iyang huna-huna dihang gianunsiyo sa Blackwater nga andam sila i-trade si Poy Erram.
"As far back as the Asian Games, the Blackwater Elite have been discussing a trade with us involving Poy Erram, a much-needed big man who impressed coach Yeng during his stint with the national team," matud pa sa opisyal nga statement sa NLEX.
Dili pa hinuon opisyal ang kasabotan, apan si Desiderio uban ang No. 7 pick nga si Abu Tratter mapunta sa Elite bugti ni Erram.
Ang Road Warriors naglisud pagbalibad sa maong trade tungod kay si Erram usa ka All-Star forward ug napamatud-an na ni Guiao nga usa ka masaligang scorer dihang niduwa kini sa Gilas Pilipinas.
Kun maopisyal na ang maong trade, ang Blackwater mas mobata ug aduna sila'y tulo ka mga rising rookies human nila mabira ang No. 2 pick ug kanhi NBA D-League cager nga si Parks.