CBA Visayas Leg giplastada na

CEBU, Philippines — Tumong sa Community Basketball Association (CBA) nga makakuha og 12 teams alang sa Visayas leg niini nga gikatakdang mosikad karong Enero 12.

Mao kini ang  gipahibalo nilang CBA Founder ug Director Carlo Maceda, CBA Commissioner Alfredo 'Pido' Jarencio ug CBA Visayas Governor Beaujing Acot atol sa ilang organizational meeting nga gitambongan sa nagkadaiyang mga coaches sa miaging gabii didto sa Chika-an restaurant sa Parkmall.

Imbes nga usa ka open competition, ang Visayas leg magsubay og 21-under format susama sa malampuson kaayong Cebu Governor's Cup.

Gawas sa limitasyon sa edad, ang nakalahi sa CBA sa uban nga liga mao nga mga players gyud sa lugar nga ilang girepresentahan ang makaduwa. Walay labot ang mga Fil-Ams, kanhi pro ug langyaw nga mga magduduwa.

Si Maceda  miingon nga matag team ila lamang pangayoan og P550,000 nga membership fee sa entiro   tulo ka buwan nga torneyo.

Ang mokampiyon sa Visayas leg makigtigi sa mga maghari sa National Capital Region (NCR), Luzon ug Mindanao legs sa national finals sa bulan sa Abril sunod tuig. Ang grand champion modawat og P2 million, apan ang katunga niini idonar ngadto sa barangay o dili ba sa public school nga pinili sa winning team.

Kadtong interesado nga mga teams gihatagan lamang kutob karong Disyembre 10 aron pagbayad sa ilang reservation fee nga P50,000. Alang sa dugang mga detalye, mahimong mokontak ni coach Carlito Caro (0906-4735868).