Wilder, Fury magbinukbukay na
CEBU, Philippines — Miabot na ang takna nga gipaabot sa tanan gumikan kay ang duha ka wa'y pildeng matador ibabaw sa ring nga sila si WBC heavyweight champion Diontay Wilder ug Tyson Fury magbinukbukay na karong adlawa didto sa Staples Center sa Los Angeles, California.
Atol sa official weigh-in kagahapon, si Wilder (40-0, 39KOs) mitimbang og 212.5 libras nga maoy labing gaan sa iyang karera, samtang si Fury (27-0, 19KOs) mas bug-at nga adunay 256.5 libras.
Mas gaan man tuod og dul-an 20 ka kilo ni Fury, apan si Wilder mas hait og sinultihan gumikan kay mibahad kini nga iyang palukapahon ang Briton niyang kaatbang.
"Talk is cheap," matud pa ni Wilder agi'g pagsalikway sa mga birada ni Fury ngadto kaniya. "Actions speak louder than words. It's definitely the most important fight of my career, but it's not the most difficult. I've fought way tougher guys than him. I'm going to knock him out."
Apan wala kini panumbalinga sa 30-anyos nga si Fury nga mibawos sa pag-ingon: nga wala pa niya igkita ang boksidor nga makapatumba kaniya ibabaw sa ring ug dili sab mahitabo nga si Wilder.
- Latest
