Nietes kompiyansa modaog sa sangka batok ni ioka
CEBU, Philippines – Nagpanikad na si three-division world champion Donnie 'Ahas' Nietes (41-1, 23KOs) nga mopakita sa iyang abilidad atubangan sa mga boxing fans sa Macau sa sangka niini batok ni Japanese star Kazuto Ioka (23-1, 13KOs) alang sa bakanteng WBO super flyweight title atol sa bisperas sa bag-ong tuig.
"He (Ioka) is a good boxer. Kita ko sa iyang mga fights, pero mas daghan pa ko nakontra nga mas maayo kaniadto. Mas gahi pa niya," matud pa sa longest reigning Filipino world champion atol sa press conference kagahapon didto sa Summit Circle Hotel Cebu. "Honestly, dili siya nga lisud nga kontra para nako. Gusto gyud ko nga makuha na ang bakus."
Kini ang ikaduhang higayon ni Nietes nga maangkon ang bakanteng WBO belt human siya mapakyas niadtong Septiyembre dihang gitabla ang ilang sangka ni Ashton Palicte didto sa California.
Kun modaog, si Nietes nga ranked No. 1 sa WBO, ang ikatulong Pinoy world champion nga modaog og upat ka kalibotanong bakus sa upat ka managlahing timbang.
Sama niya, si Ioka nag-apas usab og kasaysayan isip labing unang Japanese boxer nga mamahimong four-division world champ.
Sa katapusan niyang sangka niadtong Septiyembre, ang No. 3 rank nga si Ioka mipukan ni Puerto Rican McWilliams Arroyo.
Sa wala pa si Arroyo, gikasangka na ni Ioka ang ubang sikat nga boksidor sama nila ni Juan Carlos Reveco ug Felix Alvarado sa Argentina, Thai Amnat Ruenrueng, Jean Piero Perez sa Puerto Rico ug ang kababayan niyang si Akira Yaegashi. (BANAT NEWS)
- Latest
