Lakers nakabawos

CEBU, Philippines – Mitimbre og 24 puntos LeBron James  uban ang 10 ka rebounds ug siyam ka assists, samtang si Kyle Kuzma mitali og sayes sa iyang 21 puntos sa katapusang minutos sa duwa aron  giyahan ang Los Angeles Lakers ngadto sa kulbahinam nga daog batok sa Minnesota Timberwolves, 114-110, sa NBA kagahapon didto sa Staples Center sa Los Angeles, California.

Sila si Josh Hart ug Brandon Ingram nagkumboya'g 41 puntos alang sa Lakers nga nakabawos sa mapait nga kaparotan nga ilang nahiaguman sa mga kamot sa Wolves siyam ka adlaw pa lamang ang milabay.

Ang tres Kuzma maoy nakahatag sa Lakers sa kinadak-an nilang labaw, 111-104 sa nahibiling 1:51 sa duwa, apan si Derrick Rose miposa og duha ka sagunson nga tres aron pagpasikit sa Wolves, 110-111 sa daginutong segundos.

Human si Kuzma mipasud og usa ka free throw, duna pa unta'y tsansa ang Wolves nga ilogon ang labaw, apan nasipyat ang 3-pointer ni Rose taliwala sa hugot nga depensa ni Tyson Chandler. Si Hart milansang dayon og duha ka krusyal nga free throws aron pagtuldok sa makutas nga daog sa Lakers.

Si Rose mibahog og 31 puntos ug si Jimmy Butler mikadlit og 24 puntos alang sa Wolves nga wala pa gihapo'y daog sa pito nila ka road games karon nga season.

Didto sa Sacramento, si Kawhi Leonard nagparamdam dayon sa iyang pagbalik gikan sa injury human miratsada og 25 puntos ug 11 ka rebounds sa dihang  ang Toronto Raptors mipaluhod sa Kings, 114-105 aron inaton ang labing nindot nga rekord karon sa liga ngadto sa 11-1.

Si Pascal Siakam mitali og 11 puntos, si Serge Ibaka dunay 14 puntos ug 14 sab ka rebounds, samtang si Kyle Lowry mihipos og 16 puntos ug walo ka assists alang sa Raptors nga nakasagunson na og lima ka daog human makatilaw sa una nilang pilde batok sa Milwaukee Bucks niadtong Oktubre 29.

Didto sa Indianapolis, si Joel Embiid mikolekta og 20 puntos ug 10 ka rebounds alang sa Philadelphia 76ers nga midaog sa labing una  nilang road game karon nga season sa iskor nga 100-94 batok sa Pacers.

Miabag ni Embiid si Ben Simmons nga mipupo og 16 puntos, 10 ka rebounds ug walo ka assists alang sa 76ers.