CEBU, Philippines – Mipabuhagay og 40 puntos si CJ McCollum alang sa Portland TrailBlazers nga milubong sa Milwaukee Bucks, 118-103 sa duwa nila sa NBA kagahapon.
Mipasud si McCollum og 17 sa 23 niya ka itsa, apil na ang lima ka tres nga nakatabang sa TrailBlazers pag-inat sa ilang rekord ngadto sa 8-3 ug ingon man pagtunol ni Giannis Antetokounmpo ug Bucks sa ikaduha niining pilde karon nga season.
Si McCollum mihimo sab og unom ka assists ug lima ka rebounds.
Misalida sab si Evan Turner nga mibahog og 16 puntos ug 11 ka rebounds, samtang sila si Damian Lillard, Jusuf Nurkic ug Jake Layman mitali sab og double figures alang sa Blazers nga misanta sa upat ka sagunson nilang pilde batok sa Blazers.
Sa laing duwa, si Luka Doncic miiskor og 23 sa dihang giputol sa Dallas Mavericks ang unom ka sunod-sunod nilang kaparotan pinaagi sa pagpilde sa Washington Wizards, 119-100.
Wala sab magpaalkansi sila si Wesley Matthews ug Dennis Smith nga nagkumboya og 41 puntos alang sa Mavs nga nagmangtas dayon pagsugod sa duwa aron paglubong sa Wizards og 21 puntos sa halftime, 70-49.
Si John Wall maoy nangu sa Wizards uban ang 24 puntos, samtang sila si Otto Porter Jr. ug Bradley Beal mihipos og 19 puntos matag usa sa pilderong koponan.
Didto sa Charlotte, ang Hornets nakasugakod sa 21 niini ka turnovers aron pagpaksit sa Atlanta Hawks 113-102.
Si Kemba Walker mikolekta og 29 puntos ug pito ka assists, samtang si Marvin Williams miamot og season-high 20 puntos sa Hornets nga nagtangag na karon og 6-5 nga baraha.