Thompson mikulit 3-point record
CEBU, Philippines — Si Klay Thompson mikulit og NBA record nga 14 ka 3-pointers sa dihang giihaw sa Golden State Warriors ang Chicago Bulls, 149-124 kagahapon didto sa United Center sa Chicago, Illinois.
Gibuak ni Thompson ang karaang marka nga 13 ka tres nga gikuptan sa iya ra sab nga teammate nga si Stephen Curry.
Sa kinatibuk-an, ang 28-anyos nga si Thompson mihipos og 52 puntos alang sa Warriors nga nagbitbit na karon og 6-1 nga baraha aron mangulo sa Western Conference.
Human sa duwa, si Thompson mitug-an nga mismo si Curry ang mi-awhag nga papason ang rekord niini gumikan kay nangigo man siya og maayo.
Sa first quarter pa lang, si Thompson mipabuto na og 22 puntos aron tabangan ang Warriors nga molansang og 44-28 nga labaw. Ang Warriors mibomba og dugang 48 puntos aron pagposte og 92-50 nga labaw sa halftime nga nakapabarag sa Bulls sa nahibiling bahin sa duwa.
Sa laing duwa, si Ersan Ilyasova mitali og 19 puntos, samtang sila si Malcolm Brogdon ug Eric Bledsoe dunay 17 puntos matag usa sa dihang gipatilaw sa Milwaukee Bucks ang Toronto Raptors sa labing una niining pilde, 124-109.
Didto sa Minnesota, si LeBron James mibahog og 29 puntos apan dili kini igo aron paglikay sa LA Lakers nga makatilaw sa ikalima nilang pilde karon nga season human sila gipakaging sa Timberwolves sa iskor nga 124-120.
Nangu sa Timberolves mao si Jimmy Butler nga mipatuasik og 32 puntos ug ingon man sila si Karl-Anthony Towns ug Josh Okogie nga nagkumboya'g 42 puntos.
- Latest
