CEBU, Philippines — Napulo'g lima ka mga sakop sa Philippine Long Distance Runners Club ang nanagan sa Cebu leg sa 42nd National Milo Marathon niadtong Oktubre 14 diha sa Cebu City Sports Center.
Apil sa nidagan ang aktibo nilang presidente nga si Berns Flores ug ang pambato sa grupo nga si Ezel Conde.
Tungod kay usa lang ka 'test run', wala sila magpuntarya og podium, apan nakita sa ilang kaubanan sa grupo nga tulin kaayo ang dagan ni Conde nga ila lang nga gipaundayonan sa panghinaut nga makasulod kini sa Top 10 sa women's 10K category.
Wala na unta'y usa ka kilometro maabot na sa finish line si Conde, apan nasugatan niya ang wala damha ug kalit nga aksidente dihang nadasmagan siya og usa ka awto ug nalabay kini. Si Conde nakaangkon og daghang mga pangos ug nagkadugo pa ang ulo hinungdan sa iyang pag-'panic'.
'Nakaingon gyud ko nga mao na to. Didto na lang kutob akong kinabuhi," asoy pa ni Conde.
Pipila ka minutos human sa panghitabo, nalabyan ni Flores ang iyang kauban nga si Conde. Gusto gyud unta niyang humanon ang maong lumba, apan iyang gihuna-huna ang kahimtang ni Conde ug ang responsibilidad niini isip lider sa grupo.
Usa ka beteranong ultra-marathoner si Flores ug salikwaot kaayong paminawon alang kaniya kun dili motiwas sa 10 kilometros nga lumba.
Apan ang tawhanon nga kinaiya maoy mipasulabi sa huna-huna ug sa kasingkasing ni Flores ug nidesider nga moundang na lang og dagan aron kuyogan si Conde pagpatambal sa usa sa mga hospital dinhi sa Sugbo.
"Thankful kaayo ko nga sila ang akong naka- team. Labaw na gyud sa among president nga si Berns Flores wala gyud ko niya biyai during the accident. Wala gyud siya ning finish sa iyang race. Iya gyud kong gi-kuyogan. Naa siya pag-admit nako hangtod na discharge ko sa hospital. Sa akong mga teammates, wala gyud ko nila gipasagdaan," sumala pa 22-anyos nga si Conde.
Karon padayong nagpaalim si Conde sa iyang samad didto sa Pinamungajan ug pabiling masalingon nga makabalik sa pagdagan ugma damlag ug ipadayon ang iyang damgo nga mahimong sunod nga kampiyon.
Nagpasalamat siya dili lang sa iyang pagkaluwas gikan sa posibleng kamatayon, kun dili sa iyang mga kauban sa team ug sa tanang mga nitabang ug nagpakabana kaniya.
Para kang Conde, ang gipakita nga kaayo ug suporta sa iyang mga kauban ug sa tibuok running community nga nisalmot sa miaging Milo Marathon labaw pa sa bulawang medalya ug tropeyo nga iyang naangkon.
Sa kalipay ug kasakit, sa kadaogan ug kapildihan, kun ang tanan magkahiusa, magmalampuson kini sa bisan unsang matang sa pagsulay, dili lamang sa dagan, kun dili sa mga pagsulay sa kinabuhi.