UV nagpanikad na

CEBU, Philippines – Ang University of the Visayas (UV) Green Lancers naglaraw nga magsaulog na sa ilang korona, samtang ang University of San Jose-Recoletos (USJ-R) Jaguars nagtinguha nga makaangkon og laing kinabuhi sa dihang mag-abot sila og usab alang sa Game 2 sa 'best-of-three' collegiate division finals sa 18th Cebu Schools Athletic Foundation, Inc. (CESAFI) men's basketball tournament  karong alas-6 sa gabii diha sa Cebu Coliseum.

Ang Green Lancers ni coach Gary Cortes mitikang ngadto sa usa na lang ka daog aron kab-uton ang ilang damgo nga maka-'grandslam' human makaeskapo  batok sa Jaguars,  78-74  sa Game 1 niadtong Huwebes.

Salamat sa krusyal nga   mga  tres  nilang Rey Anthony Suerte ug Jafet Claridad ug nagmadaugon ang Lancers sa sikit kaayong duwa.

Bisan og sila si Suerte ug Claridad maoy mikuha og atensiyon, dili malalis nga angayan sab nga hisgutan silang UV sophomore forward Jancork Cabahug ug Liberian import Bassieru Sackor.

Dihang ang Jaguars milabaw og 11 puntos sa first period, si Cabahug mitagak og 12 sa iyang 16 puntos  sa first half nga nakapalabaw sa Lancers sa halftime, 42-39.

Samtang gipuhalan sab ni Sackor ang mas taas ug mas dako niyang karibal  nga si Segamars Ewenike sa USJ-R .

Si Sackor mikadlit og 18 puntos, siyam ka rebounds, tulo ka assists, tulo ka steals ug duha ka blocks. Wala kaugpo kaniya si Ewenike nga mihipos lamang og sayes puntos bisan tuod og milangkat kini og 19 ka rebounds.

Gipakita sa UV nga bisan og sila nagkalisud duna sila'y kapasidad nga tumbahon ang ilang kaatbang gamit ang ilang kadasig.

Sa habig sa Jaguars, kinahanglan nga menosan nila ang ilang mga sipyat aron   ma-inat nila ang serye.

Gawas nilang Nicole Ubalde ug Fletcher Galvez, sila si Jaybie Mantilla, RJ Dinolan, Juan Miguel Gastador ug Tricky Dyn Peromingan kinahanglan nga mobirada og maayo ilabi na karon nga wala na'y ugma nga nagpaabot pa kanila.