CEBU, Philippines – Taas-taas gyud nga panahon nga mawala sa eksina sa PBA si Jayson Castro tungod sa operasyon sa iyang tuong tiil.
Matud pa sa star veteran nga mobalik siya og duwa kun mahingpit na og kaalim ang iyang injury. Giila kaniadto nga 'Best Point Guard in Asia', ang 32-anyos nga si Castro miangkon nga miresulta na ang kakuwang niya og pahuway kay gawas sa TNT KaTropa sa PBA, niduwa usab siya sa Gilas Pilipinas.
Human maapil og kasuspenso sa FIBA tungod sa iyang kalambigitan sa rambol tali sa Gilas ug Australia niadtong Hulyo, si Castro nakadesisyon nga magpaopera aron maayo ang nagsigeng sakit niyang tiil. Hinuon, si Castro mipasalig nga kun makabalik na siya og duwa, sento porsiyento na siya uban sa TNT ug sa Phl team.