Lancers miihaw sa Wildcats

CEBU, Philippines – Ang two-time defending champion University of the Visayas (UV) Green Lancers miihaw sa Cebu Institute of Technology-University (CIT-U) Wildcats, 98-79 aron pagpabiling walay pilde sa ikaduhang hugna sa eliminasyon sa 18th Cebu Schools Athletic Foundation, Inc. (CESAFI) men's basketball tournament kagabii diha sa Cebu Coliseum.

Si Josue Segumpan maoy nangu sa unom ka players nga naka-double figures uban ang 19 puntos, upat ka rebounds, upat ka assists ug tulo ka steals sa Green Lancers nga  nagsolo na karon sa  ikaduhang puwesto sa collegiate division bitbit ang 7-3 win-loss record.

Miamot si Michael Maestre og 16 puntos ug 11 ka rebounds, si 2017 Seniors Most Valuable Player Rey Suerte mitampo og 15 puntos ug si Jafet Claridad mitali og 14 puntos alang sa Lancers nga midominar sa duwa gikan sa pagsugod dayon na ngadto sa pagposte og 10 puntos nga labaw, 76-56 human sa tulo ka kuwarter.

Ang Lancers nga nakapasol sab og 21 puntos gikan nilang Jiezel Tarrosa ug Gileant Delator miposte sa kinadak-an nilang labaw nga 23 puntos, 84-61 sa tres ni Jancork Cabanug sa nahibiling 8:33 sa duwa.

Ang Wildcats igo lamang nakasikit ngadto sa 13 puntos, 77-90 sa nahibilin nga 2:08 sa duwa gumikan kay sila si Segumpan ug Suerte miposa og duha ka sagunson nga tres aron pagsilyo sa demolisyon sa Lancers.

Si Kenny Rogers Rocacurva mitali og 20 puntos ug si Jessie Aloro mihipos og 19 puntos sa Wildcats, kansang makapakurat nga daog batok sa University of San Carlos (USC) Warriors ug University of Cebu (UC) Webmasters naputol hinungdan sa ilang pagkahagsa ngadto sa 2-8.