Jaca, Oliverio nanghawod sa Jawad tablenetfest
CEBU, Philippines – Gidominahan sa Cebuano table paddlers Val Stephen Jaca ug Diana Oliverio ang premiere open division sa 27th Erne Jawad Memorial Cup niadtong weekend didto sa Robinsons Galleria-Cebu.
Ang kanhi varsity sa University of Cebu (UC) nga si Jaca nga atua na karon sa Hua Ching Foundation, midaog na gyud og titulo sa men's open human pildiha si John Russel Misal sa Table Tennis Association for Development (TATAND), 11-7, 11-5, 11-8.
Sa iyang bahin, si Oliverio mao sab ang misakmit sa singles crown human gipilde si Keith Rynne Cruz sa TATAND, 11-9, 6-11, 11-4, 11-7 sa ilang final match.
Nakabalos hinuon si Cruz sa iyang kapildihan ngadto ni Oliverio pinaagi sa pagpangu sa TATAND ngadto sa 2-0 nga kadaogan sa team event.
Gawas ni Oliverio, ang UC mihakot sab og daghang dungog diin si Andrei Caballes nanghawod sa boys 13 ug Eljay Tormis midaog og silver sa boys 19. Lain pang duha ka mga pambato sa UC nga sila si Henze Dominique Lucero ug Aira Macabinguil parehong midaog og bronze sa 18-under category.
- Latest
