CEBU, Philippines – Tungod sa super typhoon nga Ompong ang Philippine Sports Commission napugos pagsibog sa pagsugod sa Batang Pinoy National Championship didto sa Baguio ug Benguet. Ang maong multisports competition buksan unta karong Sabado, apan ang PSC misibog niini ngadto sa Lunes tungod usab sa posibleng kadaot nga dad-on sa bagyong Ompong.
Si Baguio City Mayor Mauricio Domogan mipahibalo usab nga wala nay opening ceremony, apan paningkamoton nila nga makahimo og closing celebration sa Septiyembre 22. Si Ompong misulod na sa Philippine area of responsibility kagahapon diin pipila usab ka mga delegado sa laing dapit sa nasud ang napugos pagkanselar sa ilang biyahe.
Ang PSC ug kagamhanan sa Baguio City mipasalig hinuon nga luwas ang mga delegado nga nag-una na ngadto sa Baguio City.
Si PSC chairman Butch Ramirez miingon usab nga posibleng usbon na nila ang petsa sa Batang Pinoy Nationals ug dili na itunong sa mga buwan sa ting bagyo.