Sugdan ang kumbati
CEBU, Philippines – Liboan ka mga masaarong student-athletes gikan sa tibuok rehiyon ang magkumbati na sa ilang tinagoang abilidad sa unang adlaw sa aksiyon sa 23rd Milo Little Olympics Visayas Finals karong adlawa sa nagkadaiyang binyu, kasagaran niini sa Cebu City Sports Center (CCSC).
Ang tinuig nga kompetisyon nga gipasiugdahan sa Nestle Philippines alang sa elementarya ug sekondarya nga mga tinun-an nakahulma na og mga national team members sama nila ni marathon queen Mary Joy Tabal, taekwondo champion Rinna Babanto ug Rheyjey Ortouste sa sepak takraw. Silang tulo pulos niduwa sa 18th Asian Games didto sa Jakarta, Indonesia.
Kinse ka sporting disciplines ang tigian sa tulo ka adlaw nga multi-sporting event ug kini mao ang swimming, football, sepak takraw, basketball, volleyball, chess, gymnastics, karatedo, scrabble, table tennis, taekwondo, badminton ug tennis.
Manalipod sa tagsa-tagsa nila ka mga titulo ang University of San Carlos-BED sa secondary division ug St. John Institute sa Bacolod sa elementary category.
Lisud hinuon nga hagit ang sagubangon sa USC-BED ilabi na sa University of Cebu nga nagpangagot na nga mobalik og lingkod sa trono. Mao sab ang mga bisitang atleta gikan sa Bacolod kay gaatang kanila ang University of the Visayas, SHS-Ateneo ug ang University of San Jose-Recoletos.
Adunay 168 ka tunghaan ang mosalmot sa elementarya ug 147 ang miapil sa sekondarya.
- Latest
