Cebu nasugamak og balik

CEBU, Philippines – Wala makasustinir ang Casino Active-Cebu City Sharks sa ilang kainit human mikadlit sa labing una nilang daog batok sa Batangas City Athletics gumikan kay napilde sab dayon sila  sa Davao Occidental Tigers, 64-71 sa 2018 Maharlika Pilipinas Basketball League  (MPBL) Anta Datu Cup niadtong Martes sa gabii didto sa Strike Gymnasium sa Bacoor, Cavite.

Nindot ang gipakitang duwa sa Sharks sa sinugdanan, gani nakalabaw pa sila og kuwatro puntos human sa unang kuwarter, 17-13.

Padayong abante atol sa halftime ang Sharks, 36-35 gumikan ni John Abad nga mitagak og 11 sa iyang 13 puntos sa first half.

Apan ang Sharks mikolapso dihang mibawos ang Tigers sa hinapos nga bahin sa duwa.

Human sa 52-52 nga panagtabla, ang tulo ka kanhi PBA players nga sila si Bonbon Custodio, Leo Najorda ug Mark Yee mibanat og maayo aron ituboy ang Tigers ngadto sa kadaogan. Silang tulo nagkumboya og 35 puntos.

Ang Tigers nagbitbit na karon og 3-3 record human miputol sa tulo ka sagunson nilang pilde, samtang ang Sharks nga gipangulohan ni Patrick Cabahug uban ang 14 puntos, natagak ngadto sa 1-5.

Sunod nga sangkaon sa Sharks ang GenSan Warriors ni Manny Pacquiao karong Agosto 23 didto gihapon sa Strike Gymnasium.