Ginebra mikulit ika-11 nilang franchise championship

CEBU, Philippines – Milampos ang Barangay Ginebra Kings pagkulit sa ika-11 nilang franchise championship, apan giisip nila nga ang katapusang titulo nga ilang nakuha human nila gipaluhod ang San Miguel Beermen maoy labing tam-is nga kalampusan.

Ang Ginebra milubong sa San Miguel, 93-77 sa Game 6   niadtong Miyerkules  didto sa Mall of Asia Arena, 93-77.

Ang Gin Kings misulod sa finals series nga usa ka 'underdog'  tungod  sa kalig-on sa Beermen, apan nakahimo sila sa pagpalagpot sa trono sa ilang igsuong koponan.

Si Ginebra coach Tim Cone mipalig-on sa iyang legasiya isip labing ngilngig nga PBA coach sa kasaysayan human niya gisakmit iyang ika-21 nga titulo. Ang Ginebra miputol usab sa 11 ka  tuig nilang huwaw sa Commissioner's Cup title nga katapusan nilang natilawan niadtong tuig 1997.

Sa iyang bahin, si Finals MVP Scottie Thompson nagmaya sa nadawat niyang individual award, apan nagdumili pagdawat nga siya na ang bag-ong star player sa koponan.