Jaworski misaway sa Ginebra Kings
CEBU, Philippines – Gisaway ni PBA living legend Robert Jaworski ang Barangay Ginebra Kings human sa makauuwaw niining kapildihan batok sa sister-team San Miguel, 94-132 sa Game 3 sa ilang 'best-of-seven' finals series sa Commissioner's Cup niadtong Miyerkules didto sa Smart Araneta Coliseum.
Si Jaworski, ang labing banggiitang player sa Ginebra, miingon nga wala siya makauyon sa gipakitang kahuyang nga depensa sa Ginebra nga maoy gipahimuslan sa San Miguel aron maposte og 38 puntos nga kadaogan.
Dili usab motuo si Jaworski nga naglisud pakigsakbang ang Ginebra sa rebounding batok San Miguel tungod kay anaa ilang bigmen nga sila si Greg Slaughter, Japeth Aguilar ug Joe Devance, samtang usa sa mga nailhan nga rebounding guard si Scottie Thompson.
Gusto si Jaworski nga ang Ginebra ang modaog sa defending champion nga San Miguel, apan nagtuo siya nga kon magpadayon ang bati nilang duwa, lisud nga mapalagpot nila sa trono ang Beermen.
- Latest
