Jeff Horn gusto nga makig-rematch ni Pacquiao
CEBU, Philippines — Gipadayag ni kanhi Australian champion Jeff Horn nga gusto niya ikasangka pag-usab ang Pinoy boxing superstar nga si Manny Pacquiao human masakmit ang WBA welterweight title gikan ni Argentinian Lucas Matthysse sa "Fight of Champions' niadtong Domingo sa buntag didto sa Axiata Arena sa Kuala Lumpur, Malaysia.
Si Pacquiao mipaundang ni Lucas sa ikapitong round ug bilib si Horn sa gipakita sa kanhi niya kaatbang.
Gamit iyang social media, ang Australian nga si Horn mi-congratulate ni Pacquiao dungan sa paghagit niini og usa ka 'rematch'.
"Congratulations Manny Pacquiao. Rematch?" matud pa niya sa iyang twitter account.
Si Horn midaog batok ni Pacquiao pinaagi sa controversial decision atol sa ilang sangka niadtong Hulyo 2 sa miaging tuig didto sa Australia.
Wala hinuon magdugay sa mga kamot ni Horn ang WBO title dihang gikulata siya ni undefeated Terence Crawford sa sayong bahin ning tuiga.
Si Pacquiao una nang miingon nga layo pa gyud siya sa retirement ug plano pa niya nga modepensa sa iyang bakus. Wala pa hinuon migawas gikan sa iyang kampo sa kun kinsa ang gusto nilang sangkaon sunod. (BANAT NEWS)
- Latest
