CEBU, Philippines — Ang beterano nga si Desederio Engbino ug Marivic Mari maoy migawas nga mananaug sa tagsa-tagsa nila ka dibisyon sa Kawasan Falls 80K Ultramarathon nga nanukad didto sa San Fernando Municipal ground ngadto sa Kawasan Falls.
Ang pambato sa Spectrum runners nga si Engbino mitapos sa makutas nga lumba sud sa walo ka oras, usa ka minuto ug 25 segundos aron mugawas nga labing paspas sa men's division. Nagsunod kaniya iyang teammate nga si Edilberto Batiancila sa oras nga 8:01:30, samtang si Paul Delposo maoy third placer sa oras nga 9:30:00.
Ang lumad nga taga-Bohol nga si Engbino mipakita sa iyang kasinatian tungod usab kay pipila na ka ultra marathon ang iyang gidag-an sa sud ug gawas sa Sugbo.
Sa iyang bahin, si Mari kinsa usa ka policewoman maoy midaog sa female class dihang milabang siya sa finish line sud sa 10 ka oras ug 30 minutos. Second placer si Mary Claire Maranga sa oras nga 10:37:00, samtang si Irene Oliveros ikatulo sa oras nga 11:33:00.
Ang race director nga si Edward Colina miingon nga 58 ka isug nga mga runners ang milabang sa finish line sa maong lumba diin 13 niini sa women's class ug 42 gikan sa men's. (BANAT NEWS)