CEBU, Philippines – Gipasidan-an ni Gilas Pilipinas coach Chot Reyes ang iyang mga batos nga dili mokompiyansa tungod kay ang Chinese Taipei seguradong mobawos kanila sa umaabot nilang duwa sa third leg sa 2019 FIBA World Cup qualifiers karong Hunyo 29 didto sa Taiwan.
Kini bisan pa og ilang napilde ang Chinese Taipei atol sa first leg, 90-83.
Si Gilas coach Chot Reyes miingon nga wala miduwa ang mga lig-ong players sa Chinese Taipei niadtong tungora. Segurado si Reyes nga mamawi ang Chinese Taipei sa umaabot nilang duwa kay solido ug tibuok na ang ilang puwersa.
Hitsas sab hinuon ang komposisyon sa Gilas nga padayon sa ilang ensayo. Mangu sa Gilas mao silang Andray Blatche, JuneMar Fajardo ug Jayson Castro uban nila ni Japeth Aguilar, Roger Pogoy, Troy Rosario, Matthew Wright, Terrence Romeo, Gabe Norwood, Jio Jalalon, Baser Amer, Carl Bryan Cruz, Calvin Abueva ug Allein Maliksi.
Anaa usab ang Gilas cadets nga moduwa sa Asian Games sa Agosto nga sila si Ricci Rivero, Abu Tratter ug Kobe Paras.