CEBU, Philippines — Ganado nga miaway atubangan sa iyang mga katagilungsod, ang garbo sa Tabuelan nga si Kevin Jake 'KJ' Cataraja milatos sa Indonesian nga si Frenky Rohi atol sa main event sa IDOL 3 fight card niadtong miaging gabii didto sa Tabuelan Astrodome.
Ang 23-anyos nga si Cataraja kinsa usa ka super flyweight contender gikan sa ALA Gym, migamit sa iyang kusug ug kapaspas aron paundangon si Rohi sa third round.
Gibanatan dayun ni Cataraja ang Indonesian kinsa natumba sa unang round apan nakarekober. Nakita ang deperensya sa abilidad sa duha dihang si Cataraja ang kanunay nga naggukod ni Rohi.
Wala na kaikyas si Rohi pag-abot sa third round dihang naigo siya og kusug nga hook ni Cataraja rasun nga natumba siya sa ikaduhang higayun. Nakabarug pa siya, apan wala na siya lung-i og kulata sa ALA fighter rasun nga giundang sa referee ang away sa 2:44 sa round three.
"Ready nako sa laing challenge," matud pa ni Cataraja kinsa misaka sa record nga 8-0, 7KOs, samtang si Rohi nakahiagum sa ikaunom niining pilde sa 11 ka away. "Nalipay ko kay nakahatag ko og daog sa akong mga fans ug pamilya dinhi sa Tabuelan."
Sa undercards, midaog ang duha ka stable mates ni Cataraja nga sila si Virgel Vitor ug Christian Bacolod. Gikulata ni Vitor (13-1, 7KOs) ang beterano nga si Gerpaul Valero (22-21, 16KOs), samtang si Bacolod (9-0, 7KOs) mipaundang ni Mervin Lulu (5-3, 2KOs).
Si Jhun Ryan Quimbo (7-17) miiskor og upset nga daog batok Jimmy Paypa (19-5, 7KOs), samtang si Esneth Domingo mi-KO sa first round ni Ryan Makiputin (13-13, 4KOs) ug si JR Villafuerte (1-0, 1KO) midaog sa iyang debut pinaagi sa knockout batok Tomas Rebusit (1-7, 1KO). (BANAT NEWS)