CEBU, Philippines — Mangambisyon ang M. Lhuillier Kwarta Padala-University of Cebu (UC) Webmasters ug Organique California-University of Southern Philippines Foundation (USPF) Baby Panthers nga inaton ang sagunson nilang daog ngadto sa tulo sa ilang pakigsangka batok sa tagsa-tagsa ka mga kontra sa 18th Cebu Schools Athletic Foundation, Inc. (CESAFI) Partner's Cup karong adlawa diha sa Cebu Coliseum.
Ang Webmasters mohamag sa Casino Active/University of San Jose-Recoletos (USJ-R) Jaguars sa bugtong duwa sa collegiate division sa alas-5 sa hapon, samtang ang Baby Panthers makigpinaksitay sa Cebu Institute of Technology-University (CIT-U) Wildkittens sa alas 3:30 sa hapon.
Ang Webmasters ug Baby Panthers parehong mihaw-as gikan sa duha ka sunod-sunod nga daog aron magsolo sa liderato sa tagsa-tagsa nila ka dibisyon.
Ang Webmasters mipayaka sa Southwestern University (SWU)-Phinma Cobras ug Wildcats, samtang ang Baby Panthers mipakurat sa defending CESAFI juniors champion University of the Visayas (UV) Baby Lancers sa wala pa lugloga ang Cebu Eastern College (CEC) Dragons.
Nanghinaut ang Baby Lancers nga makabawi sa miagi nilang kapildihan sa dihang ilang sangkaon ang Mandaue Hotel-University of San Carlos (USC) Baby Warriors sa pasiunang duwa sa alas-2 sa hapon.
Ang Baby Warriors naparot sa miagi nilang duwa batok sa Baby Jaguars, 60-66.