CEBU, Philippines – Midaog na sab ang Michael Angelo Coffee & Tea human makaipsot sa mga kamot sa team Lesin, 67-64 sa LABA Basketball Tournamen 2018 niadtong Biyernes didto sa Co Tiao King gym sa Tabok, Mandaue City.
Nangu sa kadaogan si Ebyong Ouano nga mibatil og 18 puntos, lakip na ang krusyal nga tres sa hinapos nga bahin sa duwa nga nakabaraw sa pangandoy sa Lesin.
Si Richard Madrid miambit og 12 puntos sa Michael Angelo Coffee & Tea ni Jeaneth Go Chu.
Ang Michael Angelo Coffee & Tea nga gipaluyohan sab nilang Roy Ermac, Eboy Quiñahan, William Oljol ug Genemar Cena nagbitbit na karon og 4-1 nga baraha.
Gibiyaan ang Michael Angelo Coffee & Tea sa nag-unang duha ka kuwarter, apan mi-rally sila sa third period ug nahimong kulbahinam ang duwa dihang nagpulipuli og ilog sa labaw ang duha ka karibal hangtod nga si Ouano mipasulod sa mahinungdanon niyang 3-pointer nga naka-paginhawa nila og lawom.
Sila si Rey Gonzaga ug Barak Recto mao sab ang nangu sa Lesin sa ilang 16 ug 10 puntos matag usa.
Sa pasiunang duwa, ang Nal's midaog sab batok sa AC Troopers sa iskor nga 72-67.
Si Rechel Bamba mikabkab og 18 puntos aron mangu sa scoring sa Nal's nilang Rechel Bamba ug Christopher Villalon nga aduna na'y 3-1 record, samtang si Rex Gonzaga mao sab ang nangu sa AC Troopers ni S/Insp. Dondon Coloscos.
Sa lain pang sikit nga duwa, singko puntos sab ang nadag-an sa Explorer ni Alan Buenavista batok sa Monterroyo/Co-Jordan nilang Dr. Raul Monterroyo ug Richard Jordan, 67-62.
Gipangulohan ni Apit Cabahug ang Explorer nga miarangkada og 14 puntos.
Nangu sa napildeng Monterroyo/Co-Jordan si Michael Tañan pinaagi sa iyang 11 puntos.
Ang liga nahimo pinaagi sa paningkamot ni S/Insp. Dondon Coloscos, ang bag-ong president sa Los Amigos Basketball Association sa abag nilang Willy Medillo, Lloyd Chavez, Nante Rayla, Macmac Borga ug Rudy Candelada.