CEBU, Philippines — Si kanhi WBO International super lightweight champion Jason ‘El Nino’ Pagara (40-3-1, 25KOs) makigsangka batok sa bag-ong kontra nga si Wellelm Reyk (19-17-4, 5KOs) sa Indonesia sa undercard sa “Pinoy Pride 44:Laban sa Leyte” karong Hunyo 9 didto sa Maasin City gym.
Si Pagara orihinal untang gikatakda nga makigbugno ni Geisler AP (12-10-1, 9KOs) apan ang ALA Promotions mipapha sa iyang pangan gumikan sa pagdawat niini og laing away niadto lamang Sabado sa gabii diin sila nagtabla ug ang kababayan niining si Ray Rajadjo.
Sa gihapon, ang maong eksplosibong pasundayag pagabitoonan sa manghud ni Jason nga si ‘Prince’ Albert Pagara (29-1, 20KOs), nga makigharong ni Laryea Gabriel Odio (20-3-2, 14KOs) sa Ghana sud sa 12 ka hugna alang sa WBO International super bantamweight title.
Sa laing sangka, ang sumusulbong nga bitoon sa ALA Gym nga si Jeo ‘Santino’ Santisima (15-2, 13KOs) sa Masbate makigtige ni Likit Chane (16-5, 10KOs) sa Thailand alang sa WBO Oriental junior featherweight title.
Si kanhi two-time world title challenger ‘King’ Arthur Villanueva (31-3, 17KOs) sa Bago City ug Melvin Jerusalem sa Bukidnon mowadwad sab sa ilang abilidad.
Mohamag si Villanueva batok ni Renren Tesoro (16-12-3, 4KOs) sa Taguig City, samtang si Jerusalem makigpinaksitay ni Philip Luis Cuerdo sa Mandaluyong City. (BANAT NEWS)