CEBU, Philippines — Ang University of the Visayas (UV) Baby Lancers mopahigayon og upat ka adlaw nga komprehensibong tryout karong Mayo 15-18.
Si Baby Lancers coach Gerald Ylaya mi-abiso ngadto sa mga interesado nga mamahimong sakop sa elite UV Basketball program nga moadto sa UV gym sa alas 2:30 sa hapon sugod ugmang adlawa.
Matud pa ni Ylaya nga ang serye sa tryouts kabahin sa seryoso nilang pangandam sa umaabot nga 18th Cebu Schools Athletic Foundation, Inc. (CESAFI) basketball season nga mosikad karong Agosto 29 diha sa Cebu Coliseum.
Ang Baby Lancers maoy defending champion sa juniors division.
Sa miaging tuig, gilumpag sa Baby Lancers ang lima ka tuig nga dominasyon sa four-time champion Sacred Heart School-Ateneo de Cebu (SHS-ADC) Magis Eagles ug sa susamang higayon gibisbisan ang unom ka tuig nilang huwaw sa titulo. (BANAT NEWS)