CEBU, Philippines — Si Ariana Thea Patrice Dormitorio maoy bugtong rider sa Philippine team nga midaog og bulawang medalya sa Philippine team sa bag-o lang natapos nga 24th Asian Mountain Bike Championship niadtong Domingo didto sa Barangay Manlayag Patag, dakbayan sa Danao.
Ang 21-anyos nga si Dormitorio midominar sa women’s under-23 category human niya gitapos ang 20.74 kilometro nga lumba sa oras nga 1:14:56.
Gipilde ni Dormitorio ang beterana nga si Natalie Payawan sa Thailand (1:21:06) ug Nur Deena Safia (1:28:10) sa Indonesia.
Sa pikas bahin, si XianJing Lyu sa China maoy misakmit sa men’s title human niya gitapos ang lumba sa oras nga 1:08:59. Iyang gipilde ang teammate niyang si Mingrun Chen sa oras nga 1:12:16 nga mipahiluna sa ikaduhang dapit. Si Mino Kim (1:14:53) sa South Korean maoy miokupar sa ikatulo.
Si Urara Kawaguchi sa Japan maoy reyna sa women’s junior category sa oras nga 35:44. Sila si Zhifan Wu (37:08) sa China ug Akari Kobayashi (38:31) sa Japan maoy mipahiluna sa nagsunod nga duha ka dapit.
Ang top three finishers sa men’s division mao sila si Jin Wei Yuan (59:22) sa China, Seong Hun Chun (1:00:43) sa South Korea ug Niyazov Bolat sa Kazakhstan (1:01:16). (BANAT NEWS)