CEBU, Philippines – Literal nga nagbaha ang mga rekord nga namugna sa NBA karon nga season.
Una, miabot ngadto sa 62 ka mga international players gikan sa 33 ka nasud ang mopakita’g aksiyon sa playoffs nga sugdan karong Domingo.
Segun sa opisyal nga pamahayag sa liga, ang tanang 16 ka teams sa Eastern ug Western Conference playoffs dunay dili momenos usa ka overseas player.
Ang Utah Jazz ug Philadelphia 76ers maoy nag-una sa listahan nga adunay tagpito ka langyaw nga mga magduduwa. Gisundan kini sa Boston Celtics, Toronto Raptors ug San Antonio Spurs nga dunay tag-unom ka international players.
Sa mga nasud, ang France ug Australia mao ang dunay labing daghang batos sa playoffs nga miabot ngadto sa tagpito. Nagsunod ang Canada ug Spain (tag-upat) dayon ang Turkey, Croatia, Cameroon ug Brazil (tagutlo).
Ang karaang rekord sa labing daghan nga international players sa playoffs miabot og 60 niadtong 2007.
Sa laing bahin, ang NBA malipayon nga mitaho nga ang 2017-2018 regular season nakahakot sa labing daghan nga nanan-aw sa usa ka season sa kasaysayan sa liga.
Sumada total, ang NBA mitala og rekord sa labing daghan nga attendance, average attendance ug labing daghan nga mga duwa diin nahurot kahalin ang mga tiket.
Sa labing unang higayon, kapin sa 22 ka milyon ka fans ang mipalit og mga tiket. Miabot sab ngadto sa 17,987 ka tawo ang nanan-aw matag duwa. Lain pang rekord mao nga miabot ngadto sa 741 ka mga duwa ang na-sold out, nga karon pa lamang nahitabo sa liga.