CEBU, Philippines — Gikompirma ni Golden Boy Promotions president Eric Gomez nga si Oscar de la Hoya molingkod sa ringside aron mosaksi sa away nilang WBA welterweight champion Lucas Matthysse ug Manny Pacquiao didto sa Axiata Arena sa Kuala Lumpur, Malaysia karong Hulyo 15.
Matud pa ni Gomez nga si De la Hoya gikatakda unta nga mokuyog ni Matthysse alang sa usa ka promotional tour didto sa Manila ug Kuala Lumpur sa miaging semana apan kalit kining gikansela gumikan kay dunay laing mas importante nga atimanon si De la Hoya kabahin sa iyang patigayon didto sa Amerika.
Giseguro hinoon ni Gomez nga dili sipyaton ni De la Hoya ang pagtan-aw sa sangka nilang Pacquiao ug Matthysse gumikan kay usa ka kini ka makasaysayanong away.
“For sure, Oscar will be in K. L. for the fight. He wouldn’t miss it for the world. It’ll be historic. We all know the fight is the biggest in Malaysia in 43 years,” matud pa ni Gomez sigun sa taho ni Joaquin Henson sa philboxing.com.
Sa habig sa Golden Boy, si Gomez nagkanayon nga naglantaw sila sa unahan sa maong pasundayag uban ang tumang kahinam kay sayud sila nga basta apil sa promosyon ni Pacquiao, kanunay kini nga usa ka blockbuster.
Ang MP Promotions ni Pacquiao maoy promoter sa maong event agi'g pagtambayayong sa Golden Boy Promotions ni De la Hoya.
Dili mahikalimtan ni De la Hoya si Pacquiao gumikan kay mao kini ang boksidor nga nagparetiro kaniya human siya gidabo-dabo og kulata niini sa ilang welterweight title bout usa ka dekada na ang milabay didto sa Las Vegas. (BANAT NEWS)