Weiss, Wasle pabiling XTerra Danao champs
CEBU, Philippines — Ang South African nga si Bradley Weiss ug Austrian nga si Carina Wasle mao gihapon ang migawas nga labing paspas sa tagsa-tagsa nila ka dibisyon sa 2018 XTerra Danao Asia-Pacific Championship kagahapon didto sa Danao City.
Ang 29-anyos nga si Weiss maoy men's pro champ human niya gihuman ang makutas nga 1.5K swim, 28K bike ug 8K run sud sa duha ka oras, 16 minutos ug 28 segundos.
Wa maapsi si Weiss sa iyang mga karibal nga sila si Sam Osborne sa New Zealand kinsa mirehistro og oras nga 2:17:17, samtang si Kiera McPherson maoy ikatulo sa oras nga 2:19:47.
Sa women's division, si Wasle subling mipatigbabaw sa oras nga 2:49:38. Si Wasle nagkanayon nga nahimong lisud ang lumba tungod sa kainit apan nakaya ra gihapon niya kini tungod usab sa iyang determinasyon nga madepensaan iyang korona.
Si Penny Slater sa Australia ang misakmit sa ikaduhang dapit sa oras nga 2:52:38, samtang si Myriam Guillot-Boisset sa France milandig sa ikatulo sa oras nga 2:56:33.
Sa Asia elite division, ang pambato sa Rider Omega Tri nga si Michael Acas ug Alexandra Ganzon sa Iloilo maoy migawas nga kampiyon.
Si Acas maoy nag-una sa oras nga 3:57:51 alang sa men's division gisundan nila ni Benjamin Rana (3:03:58) ug Jonard Saim (3:34:33). Si Ganzon mirehistro og oras nga 3:57:51.
Sa relay event, ang trio nila ni Karen Mae Indaya, Jessie Sanchez ug Joseph Arnel Emia misakiyo sa kampiyonato sa full relay sa oras nga 2:24:46. (BANAT NEWS)
- Latest
