CEBU, Philippines – Gatosan ka batan-ong mga basketbolista ang magdangop karong adlawa gumikan kay ang 2018 Poblacion Oriental Summer Basketball Tournament pormal nang sugdan diha sa Poblacion Oriental covered court sa lungsod sa Consolacion.
Sa dili pa ang mainit nga aksiyon sud sa korte, usa ka seremonyas sa pagbukas ang ipahigayon sugod sa alas-3 sa hapon. Angayan nga atngan sa duha ka oras nga programa nga magsugod sa tradisyonal nga parada sa mga entranteng koponan mao ang paghagpat sa ‘best muse’ ug
‘best in uniform’.
Ang duha ka bulan nga torneyo nga gituyo aron pagdugang og lamas sa tinuig nga kapistahan sa Poblacion Oriental agi’g pangilin sa mahal nilang patron nga si San Roque karong Mayo 20 naglangkob og mini (15 anyos paubos), midget (21-under), juniors (25-under) ug inter-sitio division.
Mga tropeyo ug ganting salapi ang madawat sa tanang mananaog nga teams.
Ang maong tinuig nga liga gipaluyohan ni Brgy. Capt. Melquiades ‘Leking’ Caylan, sports chairman Eva Malagar ug sa tibuok konseho sa barangay.
Ang mga duwa ubos sa superbisyon sa league commissioner Mark Anthony L. Rosal inabagan nilang Joven R. Alivio ug Narciso Monterola.