Matthysse Andam mohatag rematch ni Pacquiao

CEBU, Philippines – Taas ang kompiyansa ni Argentinian Lucas Matthysse nga siya gyud ang modaog sa gikaintapang sangka nila ni Manny Pacquiao sa Hulyo 15 didto sa Kuala Lumpur, Malaysia.

Pamatuod sa taas niyang salig sa iyang kaugalingon, ang WBA welterweight champion miingon nga andam siya nga hatagan dayon og ‘rematch’ si Pacquiao.

Si Matthysse manghod og upat ka tuig  sa 39-anyos nga si Pacquiao ug nakita niya nga mas lagsik pa siya itandi sa Pinoy boxing icon, kinsa napilde sa katapusan niining sangka   batok ni Australian Jeff Horn  sa miaging tuig.

Midayeg si Matthysse  sa ka maayong tawo ni Pacquiao atol sa ilang paghimamat sa promotional tour alang sa ilang sangka didto sa Manila ug sa Malaysia, apan dili kini makausab sa iyang tumong nga mokulit og dominanteng daog.

Kun ugaling modaog, gusto ni Matthysse nga manalipod sa iyang WBA title didto sa iyang nasud sa Argentina batok ni Pacquiao o sa laing boksidor.