CEBU, Philippines – Padayon ang tayhas nga paglawig sa Golden State Warriors ug New Orleans Pelicans aron pagposte og 3-0 nga bentaha batok sa tagsa-tagsa nila ka mga karibal sa unang hugna sa best-of-seven NBA playoff series.
Didto sa AT&T Center sa San Antonio, Texas, si Kevin Durant miburak og 26 puntos uban ang siyam ka rebounds ug unom ka assists sa dihang gipilde na sab sa Warriors ang Spurs, 110-97 aron pagtikang ngadto sa usa na lang ka daog ug moabante sa ikaduhang hugna sa playoffs.
Napiangan nang daan ang Spurs gumikan kay wala uban kanila si coach Greg Popovich nga nagbangutan sa kamatayon sa pinangga niyang asawa nga si Erin (basaha ang lahing estorya).
Si Klay Thompson miamot og 19 puntos, samtang si Shaun Livingston dunay 16 puntos alang sa Warriors nga milusad og 20-9 rally aron pagduso sa singko puntos nilang alkanse ngadto na sa sayes puntos nga labaw sa halftime, 52-46. Kontrolado na sukad niadto ang duwa sa Warriors.
Si LaMarcus Aldridge maoy nangu sa Spurs bitbit ang 18 puntos, samtang si Tony Parker mitali og 16 puntos sud lamang sa 17 minutos alang sa pilderong kawsa.
Didto sa Portland, si Nikola Mirotic mibugha og 30 puntos, walo ka rebounds ug tulo ka steals sa dihang ang Pelicans milansang sa ikatulo nilang sagunson nga daog batok sa TrailBlazers, 119-112.
Wa sab magpabitin si Anthony Davis nga mihipos og 28 puntos, 11 ka rebounds ug tulo ka steals alang sa Pelicans nga usa na lang ka daog ang gikinahanglan aron moabante sa ikaduhang hugna sa playoffs sa labing unang higayon sukad niadtong 2008.
Si Damian Lillard mitali og 20 puntos alang sa Portland, apan kasiyam nasipyat sa 14 niya ka itsa. Sila si CJ McCollum ug Al-Farouq Aminu nagkumboya’g 43 puntos, apan wa’y nahimo alang sa TrailBlazers.
Sa Miami, ang nagmaskara nga si Joel Embiid mipabuto og 23 puntos sa iyang post-season debut, samtang sila si Marco Belinelli ug Dario Saric midonar og 21 puntos matag usa sa dihang gipabugnaw og balik sa Philadephia 76ers ang Heat, 128-108, aron pag-angkon og 2-1 nga bentaha sa kaugalingon nilang serye sa Eastern Conference.
Katambayayong ni Embiid si Ben Simmons nga mitapos uban ang 19 puntos, 12 ka rebounds ug pito ka assists sa Sixers nga midaog ka-18 sa katapusan nilang 19 ka duwa.
Si Goran Dragic maoy nangu sa Miami uban ang 23 puntos.