CEBU, Philippines – Ang Nevada Athletic Commission misagpa og unom ka buwan nga suspensiyon ni Mexican boxing superstar Canelo Alvarez kagahapon gumikan sa paggamit niini og ginadiling drugas nga pampalagsik.
Si Alvarez mipositibo sa drug test nga nakadiskaril sa usa unta nilang “blockbuster rematch” tali ni middleweight champion Gennady Golovkin sa Mayo 5.
Madayon hinuon ang away ni Golovkin sa Mayo 5 apan lahi na ang iyang kontra nga si Vanes Martirosyan didto sa Stubhub Center sa California.
Sa maong sangka, si Golovkin manalipod sa iyang WBC, WBA ug IBF titles.
Bisan og nabaraw ang ilang away, sila si Golovkin ug Canelo parehong naglaum nga mag-abot ra gihapon sila og balik ibabaw sa ring. Ang duha unang nagsangka sa miaging tuig nga miresulta sa usa ka ‘draw’.