CEBU, Philippines – Nagpangagot ang bag-ang ni Minnesota Timberwolves star bigman Karl Anthony Towns ug mibahad pa nga magbangis sa Game 2 sa ilang pagpanulong sa Houston Rockets didto sa Toyota Center sa Houston, Texas.
Gusto ni Towns nga mapapas sa panumduman sa iyang mga fans ang ngil-ad niyang playoff debut niadtong Domingo diin igo lang siya nakahimo og otso puntos nga layo kaayo sa iyang season average nga 21.8 points. Ang eight seed nga Timberwolves gipukan sa topseed nga Rockets sa iskor nga 101-104 sa NBA first round playoff series sa Western Conference.
Ang 6-foot-10 nga si Towns mitug-an nga dismayado siya sa iyang performance, apan andam siya nga mamawi karon.
Dugang nakapainit ni Towns mao nga nalupig siya sa statistics sa iyang kaatbang sentro sa Rockets nga si Clint Capela nga adunay 24 points ug 12 rebounds sa series opener.
Si Timberwolves coach Tom Thibodeau salig hinuon nga mapakita ni Towns iyang tinuoray nga abilidad karon. Positibo si Thibodeau nga kun makuha nila ang Game 2, modako ilang tsansa nga makahimo og ‘upset’ nga kadaogan sa ilang serye.