Pacquiao di na kahadlokan

CEBU, Philippines – Ang Argentinian boxing champion nga si Lucas Matthysse namahayag nga wala siya mahadlok sa umaabot niyang sangka batok ni Pinoy boxing icon Manny Pacquiao sa Hulyo 15 didto sa Kuala Lumpur, Malaysia.

Si Matthysse moanhi sa Pilipinas alang sa  labing unang presscon nila ni Pacquiao nga kabahin sa promosyon sa maong away.

Ang WBA welterweight champ miingon nga dako siya og respeto ni Pacquiao  nga iyang giila isip usa ka boxing legend, apan angay nga makaamgo ang mga boxing fans nga dili na susama ka kusog ug kapaspas ang kanhi eight division world champion itandi sa miaging mga katuigan.

Nagtuo si Matthysse  nga mihinay-hinay na si Pacquiao sukad niadtong tuig 2012 diin na-knockout kini ni Mexican boxing star Juan Manuel Marquez.

Kun ang Pacquiao pa kaniadto, mahadlok si Matthysse, apan mas kompiyansa siya nga modaog karon tungod sa iyang nakita sa lihok sa Pinoy ring icon.

Bisan pa niini, gihulagway ni Matthysse ang sangka batok ni Pacquiao nga maoy labing dakong away sa iyang karera isip pro boxer.

Ang ‘Fighting Senator’ nga si Pacquiao  bugnaw hinuon og tonada, gani iya pang gidayeg si Matthysse nga usa ka delikadong kontra.

Hinuon, si Pacquiao mipahimangno ni Matthysse sa iyang mga nabuhat sa iyang karera ug  gitambagan  nga mag-ensayo og maayo tungod kay ipakita niya nga dili pa siya laos ug seryoso siya sa iyang misyon nga mokupot  og balik sa kalibotanong bakus.