2nd Gov's Cup pormal nga gibuksan

CEBU, Philippines — Ang ikaduhang season sa Governor's Cup Inter-Cities and Municipalities Under-21 Developmental Basketball Tournament pormal na nga misikad kagahapon didto sa Cebu Coliseum diin 45 ka koponan ang mag-ilog sa korona.

Sa dili pa ang aksyon sa hardcourt, usa ka opening ceremony ang gipahigayun kagahapon nga gitambungan ni Cebu Provincial Governor Hilario 'Junjun' Davide III ug Vice-Governor Agnes Magpale.

“We want to develop not only the physical but also the mental and emotional aspect of our athletes,” matud pa ni Magpale. “Schools and universities in the National Capital Region will be looking for potential talents in this tournament and we want this to be a way for our athletes to be recognized.”

Anaa usab kagahapon sila si Cebu Province Sports Commission chairman Michel Lhuillier ug CPSC executive director Attorney Ramil Abing. Sila si Davide ug Lhuillier mao ang nangulo sa ceremonial toss nga timaan sa pormal nga pagbukas sa torneyo.

Sa laing bahin, sila si Lorraine Hann sa Consolacion ug Nikki De Mouran sa Talisay City gikoronahan isip Miss Governor's Cup alang sa South ug North.

Magkumbati sa North Division mao ang Mandaue City, Cordova, Consolacion, Compostela, Danao City ug Carmen ubos sa North Bracket 1 San Francisco, Poro ug Tudela sa Camotes Island, Catmon, Sogod ug Borbon ubos NB2; Tabogon, Tabuelan, Bogo City, Balamban, Asturias ug  Tuburan  ubos  sa NB3 ug Santa Fe, Bantayan, Madridejos, Daanbantayan, Medellin, ug San Remigio ubos sa NB4.

Magpinaksitay sa South Division ang Minglanilla, Talisay  City, Naga City, San Fernando ug Carcar City ubos sa South Bracket 1; Sibonga, Argao, Dalaguete, Alcoy ug Boljoon ubos sa SB2; Oslob, Samboan, Santander, Ginatilan, Alegria ug Badian ubos sa SB3 ug Moalboal, Alcantara, Dumanjug, Barili, ug Aloguinsan ubos sa SB4.

Ang makampiyon mobulsa og P500,000, samtang ang mopahiluna sa ikaduha hangtod sa ikaupat ka dapit modawat og P300,000, P200,000, ug P100,000. (BANAT NEWS)