Matthysse moparetiro ni Pacquiao
CEBU, Philippines — Si WBA welterweight champion Lucas Matthysse (39-4, 34KOs) mipadayag nga gusto niining siya maoy moparetiro ni eight-division world champion Manny Pacquiao (52-7-2, 38KOs) sa dihang magbangga sila sud sa ring tulo ka bulan gikan karon.
Si Matthysse gikatakda nga modepensa sa iyang bakos batok ni Pacquiao karong Hulyo 15 didto sa Kuala Lumpur, Malaysia sa usa ka bugno nga isalida sa ESPN pinaagi sa pay-per-view.
Matud pa ni Matthysse nga ang iyang gipangandaman dili lamang ang away kondili hasta sab ang pagdaog batok sa Pinoy ring star kansang mabulokon nga karera gusto niyang tuldokan.
"Hopefully I can retire Manny Pacquiao, we are prepared for that, prepared to win," matud pa ni Matthysse sigun sa taho sa boxingscene.com
Si Pacquiao wala na maka-away pa sukad gilangkatan sa iyang WBO welterweight title ni Jeff Horn pinaagi sa kontrobersiyal nga split decision dul-an sa usa ka tuig na ang milabay didto sa Brisbane, Australia.
Nasayud hinoon si Matthysse kabahin sa risgo sa pakigtige batok sa usa ka boksidor sama sa kalibre ni Pacquiao apan sa susamang higayon nasayud sab siya nga ang positibong resulta niini makahatag kaniya og mas dakong oportunidad sa umaabot.
"I know that winning opens the doors of heaven for the future, but now I'm only thinking about this fight. Either I lose everything or I gain everything, that's the way it is,” dason pa ni Matthysse.
“ I am a world champion and he wants my belt; He chose me and I am the one who gives the OK to make the fight," dugang pa sa garbo sa Argentina. (BANAT NEWS)
- Latest
