Pinaksitay na’s NBA playoffs

CEBU, Philippines — Walo ka teams nga gipangulohan sa Golden State Warriors ang magpinaksitay pagsugod sa unang hugna sa NBA playoffs karong adlawa.

Ang Warriors nga maoy No. 2 seed sa Western Conference mo-host sa San Antonio Spurs sa Game 1 sa ilang ‘best-of-seven’ series didto sa Oracle Arena sa Oakland, California.

Mao kini ang labing unang higayon sud sa upat ka tuig nga dili topseed ang Warriors gumikan kay ikaduha lamang sila sa Houston Rockets human sa regular season.

Moduwa sab sila nga wala si Stephen Curry nga nagpaalim pa sa iyang injury. Bisan pa man niini, inilog gihapon kaayo ang Warriors gumikan sa presensiya nilang Kevin Durant, Klay Thompson ug Draymond Green.

Dili sab hinuon kakompiyansaan ang Spurs gumikan kay gawas sa pagtimon nilang LaMarcus Aldridge, Paul Gasol, Patty Mills ug Rudy Gay, maayo pa gihapon og labok ang mga beterano nilang sila si Tony Parker ug Manu Ginobili.

Sa laing aksiyon sa West, ang New Orleans Pelicans mo-host sa Portland TrailBlazers sa kaugalingon nilang serye.

Samtang didto sa East, ang Toronto Raptors makigtige batok sa Washington Wizards, samtang ang Philadelphia 76ers makig-atbang sa Miami Heat. Ang Raptors ug ang Sixers mao ang dunay homecourt advantage sa serye.

===

2nd Gov’s Cup under-21 developmental basketball tournament sugdan na

NI EMMANUEL B. VILLARUEL

Dul-an sa 700 ka masaarong mga basketbolista sa nagkadaiyang suok sa probinsiya ang magdangop karong hapon diha sa Cebu Coliseum gumikan kay sugdan na ang 2nd Cebu Governor’s Cup Inter-Cities and Municipalities Under-21 Developmental Basketball Tournament.

Sa dili pa ang aksiyon sa korte, usa ka bonggang seremonyas sa pagbukas ang ipahigayon sugod sa ala-1 sa hapon. Mismo si Gobernador Hilario ‘Junjun’ Davide III ug Bise Gobernador Agnes Magpale ang motambong niini uban sa mga mayor sa tanang partisipanteng LGUs (local government units) ug mga opisyales sa Cebu Provincial Sports Commission (CPSC) ubos sa pagpangu ni chairman Michel J. Lhuillier ug executive director Atty. Ramil Abing. 

Apil sa angayang lantawon sa duha ka oras nga programa mao ang paghagpat sa labing maanyag nga muse ug ang exhibition game tali sa mga mayor ug mga sakop sa hunta probinsiyal.

Sa pasiunang duwa sa alas-4 sa hapon, ang Bantayan makigtige batok sa Santa Fe, samtang ang Alcoy makighamag batok sa Boljoon sa alas-6 sa gabii.

Bisan pa man sa pag-atras sa Toledo City ug Pilar sa isla sa Camotes, misamot og kadako ang torneyo gumikan sa pagsalmot sa walo ka bag-ong mga koponan.

Kini naglangkob sa Cordova, Daanbantayan, Tabogon, Tabuelan, Carcar City, Alegria, Santander ug Aloguinsan.

Gikan sa 38 ka teams sa miaging tuig, 45 na ka koponan ang mopakita sa ilang abilidad.

Magkumbati sa North Division mao ang Mandaue City, Cordova, Consolacion, Compostela, Danao City ug Carmen ubos sa North Bracket 1 San Francisco, Poro ug Tudela (Camotes), Catmon, Sogod ug Borbon ubos NB2; Tabogon, Tabuelan, Bogo City, Balamban, Asturias ug Tuburan ubos sa NB3 ug Santa Fe, Bantayan, Madridejos, Daanbantayan, Medellin ug San Remigio ubos sa NB4.

Magpinaksitay sa South Division ang Minglanilla, Talisay City, Naga City, San Fernando ug Carcar City ubos sa South Bracket 1; Sibonga, Argao, Dalaguete, Alcoy ug Boljoon ubos sa SB2; Oslob, Samboan, Santander, Ginatilan, Alegria, ug Badian ubos sa SB3 ug Moalboal, Alcantara, Dumanjug, Barili ug Aloguinsan ubos sa SB4.

Ang mokampiyon mobulsa og P500,000, samtang ang mopahiluna sa ikaduha hangtod sa ikaupat nga dapit modawat og P300,000, P200,000, ug P100,000.