CEBU, Philippines — Tulo na lang ka semana ang nahibilin, apan hangtod karon wala pa gihapo’y kontra si Genady Golovkin.
Ang WBC, WBA, IBF ug IBO middleweight champion gikatakda unta nga makig-’rematch’ ni Canelo Alvarez karong Mayo 5 didto sa MGM Grand sa Las Vegas, apan nakanselar ang maong away sa dihang miatras si Alvarez nunot sa pagpositibo niini sa drug test duha ka higayon.
Bisan pa man niini, ang kampo ni Golovkin nakahukom nga paawayon gihapon nila si Triple G sa maong petsa nga mas nailhan nga Cinco de Mayo.
Duna na unta’y nakit-an ang mga promoters ni Golovkin aron iparang sa ilang boksingero.
Apan ang 21-anyos nga si Jaime Munguia nga wa’y pilde, wala tugti sa Nevada State Athletic Commission sa pag-away kay linghod pa ang abilidad niini aron ikontra ni Golovkin.
Unang mitumaw ang pangan ni Gary ‘Spike’ O’Sullivan nga sa miagi pang semana miuyon nga makigbinukbukay ni Golovkin. Apan ang problema kay dili siya Mexican, usa siya ka Irish nga dili kaayo humot sa mga Mehikanong fans.
Duna pa unta’y mga bug-at nga pangan nga haom aron iparang batok ni Golovkin, apan sila si Billy Joe Saunders, Jermall Charlo ug Danny Jacobs duna na’y nahaunang mga obligasyon.
Si Saunders modepensa sa iyang WBO title batok ni Martin Murray sa Hunyo, si Charlo moaway sa usa ka WBC eliminator batok ni Huge Centeno, samtang si Jacobs makigharong ni Maciej Sulecki alang sa WBA mandatory spot sa naghinapos nga bahin karong bulana.
Kun ugaling dili pa makakita og kontra sa mosunod nga mga adlaw, lagmit nga dili na gyud makaaway si Golovkin segun sa orihinal nga iskedyul sa Mayo 5.