CEBU, Philippines — Gibana-banang dul-an sa 200 ka bodybuilders ang moapil sa NAC World 2018 Bodybuilding and Fitness Championships sa Mayo 31 hangtod sa Hunyo 3 diha sa IEC Convention Center.
Maisip kini nga usa sa labing dakong body building event nga ipahigayon dinhi sa Pilipinas ug sa Asia tungod kay mga langyaw nga bodybuilders gikan sa 37 ka nasud sa tibuok kalibotan ang mipadayag sa ilang partisipasyon.
“It’s a record-breaking event. This is the first time for NAC-Philippines and in Asia that this kind of event is happening here,” matud pa ni National Athletic Committee president Patrick Tan atol sa press conference kagahapon didto sa Maayo Hotel.
Mga nasud nga mikompirmar sa ilang partisipasyon mao ang Belgium, Estonia, France, Greece, Hungary, India, Indonesia, Iran, Israel, Italy, Kuwait, Latvia, Lithuania, Malaysia, Netherlands, New Zealand, Norway, Poland, Romania, Russia, Slovakia, Spain, Turkey, Turkish Republic of Northern Cyprus , Ukraine, United Kingdom, United Arab Emirates, Germany, China, Japan ug South Korea.
Kini ang unang higayon nga dinhi sa Asya ipahigayon ang World Championship sukad kini natukod 12 ka tuig na ang milabay.
Si Dennis Delgado sa Workout Fitness Center miingon nga mas lingaw ang maong kompetisyon kay gawas sa men’s bodybuilding, ang ubang mga kategoriya naglakip sa athletic, men’s physique ug bikini, shape ug figure alang sa mga kababayen-an.