Cebu Parklane hotel mosuporta sa aspiring Paralympian
CEBU, Philippines — Hayan nga matuman ang damgo ni paratriathlete Alex Silverio nga morepresentar sa nasud sa 2020 Paralympic didto sa Tokyo, Japan sa Agosto.
Kini human ang Cebu Parklane International Hotel misaad nga motabang ni Silverio nga mahimong labing unang Pinoy paratriathlete nga moduwa sa Paralympics.
Ang 29-anyos nga si Silverio naputlan sa iyang walang kamot human sa usa ka aksidente sa motor, nagsugod isip usa ka runner, apan nahilig kini sa triathlon. Mihimo siya sa iyang ‘debut’ duha ka tuig na ang milabay atol sa San Remigio Triathlon.
Ang Parklane sa pagpangulo sa general manager niining si Cenelyn Manguilimotan mohatag og P200,000 matag tuig alang sa training ug salmotan nga mga lumba ni Silverio pangandam sa Paralympics.
“We want to showcase Cebuano talents especially in sports,” matud pa ni Manguilimotan. “The main goal here is to help Alex achieve his goal to be in the Tokyo 2020. We promise that we will give him support until he reaches his dream.”
Ang Philippine Paratriathlon Committee (PPTC) mihatag na usab og luna ni Silverio sa national paraathlete pool.
Ang dalan ni Silverio paingon sa 2020 Paralympic sugdan sa Agosto sa iyang pagsalmot sa 2018 Mount Mayon STC Paratriathlon Asian Championship didto sa Legazpi, Albay. (BANAT NEWS)
- Latest
