CEBU, Philippines - Nakasugakod ang Southwestern University-Phinma (SWU) Baby Cobras sa hait nga labok sa Cebu Institute of Technology-University (CIT-U) Wildkittens aron pagkulit niini og kulbahinam nga daog, 80-73 sa 17th Cebu Schools Athletic Foundation, Inc. (CESAFI) kagabii diha sa Cebu Coliseum.
Sila si Patrick Montano ug Zareygel Rosano mitikdol og 21 puntos matag usa alang sa Baby
Cobras nga mikamang ngadto sa top four sa juniors division bitbit ang 2-1 win-loss record.
Sikit kaayo ang kumbati sa duha ka koponan gikan sa sinugdanan hangtod sa naghinapos nga bahin, apan ang Wildkittens katapusang nakalabaw sa iskor nga 66-65 gumikan kay sila si Rosano, Montano ug Earl Flores mipasiugda og 11-5 run aron pagpaginhawa sa Cobras, 76-70.
Nakasikit pa og usab ang Wildkittens, 73-76, apan si Montano milansang sa iyang break-away lay-up ug dayon si King Cabansay mipasulod sa iyang follow-up shot aron pagsilyo sa daog sa Baby Cobras.
Si Windzel Granada mipabuto og 23 puntos, samtang si Marion Abinuman miamot og 13 puntos, apan nakawang ang ilang paningkamot kay ang Wildkittens nakatilaw sa ikatulo nilang sagunson nga pilde. (BANAT NEWS)