Gilas gitagak sa South Korea
CEBU, Philippines - Gibuak sa South Korea ang kasing-kasing sa Pinoy basketball fans human nila gitagak ang Gilas Pilipinas pinaagi sa paglubong, 118-86 sa quarterfinals sa FIBA Asia Cup kagahapon sa kaadlawon didto sa Nouhad Nawfal Stadium sa Beirut, Lebanon.
Misangpot sa dili maayong panag-ingnan ang katapusang resulta sa kampanya sa Gilas nga mikompleto unta og 3-0 sweep sa preliminary rounds.
Ang South Korea miabante sa semifinals diin sangkaon nila ang Iran.
Kini ang ikaduhang sunod-sunod nga daog sa South Korea batok sa Gilas nga napilde sab nila sa miaging William Jones Cup.
Katapusang midaog ang Gilas batok sa South Korea niadtong 2013 FIBA Asia Cup nga maoy pasaporte nila sa 2014 FIBA World Cup.
Dili hinuon mabasol si Gilas coach Chot Reyes ug iyang mga batos kay grabe kaayo ka hingigo gikan sa 3-point area ang South Korea diin mitusak sila og 21 sa 25 nila ka tres.
Mibida sa ataki sa South Korea sila si Kim Sun Heung, Ho Sekeun ug Jeon Junbeaom.
Gikan sa otso puntos nga labaw sa first half, ang mga Koreano mipauwan og tres sa third period aron moposte og 26 puntos nga labaw sa iskor nga 85-69 sa maong kuwarter.
Ang Gilas nga moduwa na lang sa classification phase diin tuyo nila nga motapos sa taas nga standing sa torneyo gipangulohan ni Terrence Romeo nga adunay 22 puntos, gisundan ni Chris Standhardinger sa iyang 17 puntos ug RR Pogoy nga mitampo’g 12 puntos. (BANAT NEWS)
- Latest
