Gilas Pilipinas sukdon sa Indonesia karong gabii
CEBU, Philippines - Wala pa’y nakahulga sa Gilas Pilipinas sa nangagi nilang mga duwa diin ilang gipanglubong ang upat nila ka mga kontra.
Apan giatngan nga masukod ang abilidad sa nasudnong koponan sa ilang pakigharong batok sa Indonesia karong gabii didto sa Smart Araneta Coliseum.
Ang Indonesia adunay 5-0 nga rekord ug gitan-aw nga maoy lig-on nga koponan sunod sa defending champion nga Gilas.
Ang Indonesia gilauman nga mopagawas sa tanan nilang hinagiban karong gabii. Sila ang ikaduhang koponan uban sa Gilas nga adunay naturalized player dihang ilang gikuha ang serbisyo ni Jamarr Johnson.
Ang 6-foot-5 nga si Johnson, kanhi US NCAA standout, plano nga mohatag og labad sa depensa sa Gilas Pilipinas.
Gawas ni Johnson, anaa usab ang Indonesian-American nga si Arki Wisnu, usa sa mga sinaligang tirador sa mga Indonesia.
Krusyal ang duwa karon tungod kay ang Indonesia maoy bugtong babag sa Gilas Pilipinas pagsakmit sa kampiyonato sa 2017 SEABA ug ingon man luna sa FIBA Asia Cup sa Agosto didto sa Lebanon. (BANAT NEWS)
- Latest
