CEBU, Philippines - Positibo si Top Rank Inc. CEO Bob Arum nga hugopan sa mga Australian boxing fans ang sangka nila ni Manny Pacquiao ug Jeff Horn sa Hulyo 2 didto sa Suncorp Stadium sa Brisbane, Australia.
Matud ni Arum nga bisan og dili popular sa Estados Unidos ang away ni Pacquiao batok sa dili kaayo iladong si Horn, bagang duot sa mga Australian fans ang mopakita og suporta hinungdan nga mahimong daku ang maong sangka.
“The whole country is engaged in it. The ticket sales have been absolutely enormous. It’s trending towards a sellout which will be around 55,000 and I’m sure that we’ll be up around past 40,000 by next week and on our way to a complete sellout,” matud pa ni Arum sa boxingscene.com.
Miingon si Arum nga bisan pa og sa balwarte ni Horn ang sangka, makadawat gihapon og abiba si Pacquiao nga giidolo sa kadaghanan sa mga Australian tungod sa abilidad ug legasiya sa Pinoy boxing icon.
Dili sab magpaperi ang Filipino community sa Australia nga misaad nga mosuporta ni Pacquiao nga manalipod sa iyang WBO welterweight title. (BANAT NEWS)