CEBU, Philippines - Gihimakak sa officer-in-charge (OIC) sa Provincial Environment and Natural Resources Office (PENRO) nga motugot sila og operasyon sa quarry bisan og expired na ang permit.
Si Baltazar Tribunalo, miklaro nga ang mga wala’y permit nga mangubkob ila gyung dakpon. Apan iyang giangkon nga adunay mga gihatagan og extension sa special permit. Diin ang paghatag og extension depende kun aduna pay available nga resources sa lugar. Apan kun wala’y tukmang dokumento ang hauler, dili gyud kini maka-renew sa iyang permit.
Gibutyag ni Tribunalo nga ang tibuok probinsiya adunay 200 ka haulers nga molukat og permit sa ilang buhatan. Mao nga iyang giawhag ang publiko nga motaho dayon sa ilang buhatan kun adunay mahibaw-an nga hauler nga nag-operate bisan og wala’y permit.
Ang masakpan, makabayad og P10 mil nga multa subay sa ordinansa sa probinsiya.
Sa sayo pa, giingong gibaliwala sa Kapitolyo ang rekomendasyon sa PENRO sa pagpahunong sa pagpangubkob sa bas ug graba sa Guinabsan River sa Lungsod sa Asturias. Kini human giingong gilugwayan ni Gobernador Hilario Davide III ang Sand and Gravel Industrial Permit (SAG-IP) ni Ely Macapobre ug Pablo Joel Dumdum nga ni-expired na sa niaging tuig.
Gikataho usab nga ang kagamhanan sa Asturias wala na motugot sa aplikasyon sa duha ka permittees base sa rekomendasyon sa PENRO.
Giingong kun dili aprobahan sa munisipyo, mahimo ra nga ang barangay ug ang Hunta Probinsiyal ang mohatag sa pagtugot.
Sa milabay’ng tuig ang konseho sa lungsod niawhag sa pagpahunong sa pagpangubkob sa bas ug graba sa Guinabasan River gikan sa Brgy. Sta. Rita hangtud sa Brgy Lanao.
Giingong nasuta sa monitoring team sa PENRO nga naabot na sa gi-limit nga lugar ang operasyon sa permit ni Macapobre ug Dumdum ug makaguba na sa lugar kun tugotan pa nga makapadayon. (BANAT NEWS)