CEBU, Philippines - Si Stephen Curry miratsada og 32 puntos sa dihang ang Golden State Warriors nakasugakod sa ika-20 nga triple-double ni James Harden karon nga season dayon na ngadto sa pagpahagsa sa Houston Rockets, 113-106 sa NBA kagahapon didto sa Toyota Center sa Houston, Texas.
Ang Warriors miangkon sa ikawalo nilang sagunson nga daog aron pag-inat sa labing nindot nga rekord sa liga karong season ngadto sa 60-14.
Nakasikit pa unta ang Rockets, apan si Curry milansang og krusyal nga tres sa nahabiling 1:46 sa duwa nga nakapabuhi og balik sa dugo sa Warriors.
Si Klay Thompson midugang og 25 puntos, samtang si Draymond Green mipuno’g 19 puntos uban ang siyam ka rebounds ug tulo ka steals nga nakapahayag og samot sa dalan sa Warriors aron mamahimong topseed padung ngadto sa playoffs duha ka semana gikan karon.
Nagmaya sab si Warriors coach Steve Kerr nga mitali sa ika-200 niyang daog nga maoy labing paspas nga nakab-ot sa usa ka coach sa kasaysayan sa liga sud lamang sa 238 ka duwa.
Samtang si Harden dunay 24 puntos, 11 ka rebounds ug 13 ka assists apan nakawang ang iyang paningkamot kay ang Rockets nahagba ngadto sa 41-23.
Didto sa The Palace sa Auburn Hills, ang Miami Heat pabiling mikapyot sa ikawalo ug katapusang luna sa playoff sa Eastern Conference human midaog og uno punto batok sa Detroit Pistons, 97-96.
Ang buzzer-beater follow-up shot ni Hassan Whiteside human sa mainit nga pag-inilogay sa bola maoy nagbayaw sa Heat ngadto sa himaya.
Sa laing mga aksiyon, ang Milwaukee Bucks mipukan sa Charlotte Hornets, 118-108, ang Atlanta Hawks mipakgang sa pito nila ka sunod-sunod nga pilde human gipasaop ang Phoenix Suns, 95-91, ang Minnesota Timberwolves nakaipsot sa Indiana Pacers, 115-114, samtang ang Washington Wizards midaog batok sa Los Angeles Lakers, 119-108, aron pagdominar sa Southeast Division ug pagsakmit sa labing una nilang division title sukad niadtong 1978-1979 season. (BANAT NEWS)