CEBU, Philippines - Si Borgy de la Cruz miiskor og 20 puntos uban ang pito ka rebounds sa dihang gibuntog sa Mustangs ang Hogs, 75-70 aron pag-angkon sa solong liderato sa Cebu Weekend Basketball Club (CWBC) diha sa City Sports Club-Cebu gym.
Midugang si Ed Macasling og 13 puntos, lima ka rebound, samtang si Chase Cokaliong mitali og 12 puntos, tulo ka rebounds sa Mustangs nga nagbitbit na karon og 10-1 record.
Wala sab magpabitin si Cromwell Lacuna nga dunay 20 puntos ug 16 ka rebounds ug ingon man si Jax Bautista nga dunay 15 puntos, upat ka assists sa Roosters nga mituhik sa Scorpions, 76-73 aron pagpabilin sa ikatulong puwesto bitbit ang 9-2 nga baraha.
Sa laing mga duwa, si Francis Ortega mitali og 20 puntos, unom ka assists ug upat ka rebounds alang sa Bears nga mipiog sa Pythons, 87-83, ang Penguins milatigo sa Tigers, 102-56, samtang ang Cobras mipakaging sa Toros, 89-79. (BANAT NEWS)