CEBU, Philippines - Nakabsan sa kusog ang Omega Boxing Gym fighter nga si Kenny Demecillo human siya napilde pinaagi sa unanimous decision ni Mark Anthony Geraldo sa ilang WBO Oriental bantamweight showdown didto sa Hong Kong.
Si Demecillo isug nga nakigsinukliay og mga bug-at nga kinumo ngadto ni Geraldo, apan pakyas siya tungod kay mas mipatigbabaw ang counter-punching sa nauwahi.
Human sa ilang 12 ka rounds nga binukbukay, tulo ka mga hurado ang mihatag og 98-92, 98-92 ug 96-94, tanan pabor ngadto ni Geraldo kinsa misaka sa record nga 37-3, samtang si Demecillo nakatilaw sa ikaupat niyang pilde sud sa 18 ka away.
Sa laing bahin, bisan pa sa kapakyasan sa ilang stablemate, si undefeated Jack Tepora ug Christian Araneta ganado gihapon sa nagsingabot nilang sangka batok sa mga Indonesian boxers sa Who's Next 4 karong Sabado didto sa Waterfront Cebu City Hotel and Casino.
Si Tepora moaway ni Yon Armed sa Indonesia alang sa WBO Oriental superbantamweight belt, samtang si Araneta musuway pagsakmit sa WBO Oriental light flyweight title batok ni Demsi Manufoe. (LPM) (BANAT NEWS)