Arum wa’y kalibotan
CEBU, Philippines - Walay kalibotan si Top Rank chairman Bob Arum kabahin sa kasabotan nilang Manny Pacquiao ug Amir Khan nga magsangka karon Abril.
“I have none. We’ll see what we see,” tubag ni Arum sa dihang gipangutana ni Steve Kim sa boxingscene.com kun unsay iyang panahom sa away nga gikatakda karong Abril 23.
Sa miaging adlaw, sila si Pacquiao ug Khan mipasiatab sa ilang Twitter accounts nga nagkauyon na sila nga magsinukliay og kumo didto sa United Arab Emirates diin ang Dubai maoy nag-unang kandidato isip binyu.
Ang duha ka kampo klaro kaayo nga gustong mahulma ang away bisan og walay kalabotan niini si Arum.
Mao kini ang hinungdan nganong si Arum makighimamat ni Michael Koncz, ang Canadian adviser ni Pacquiao aron sutaon ang mga detalye sa nakab-ot nga kasabotan nilang Pacquiao ug Khan.
Kahinumduman, nga si Koncz maoy mihimo og negosasyon alang ni Pacquiao aron adto mahitabo ang sunod nga away sa Pinoy ring star didto sa UAE. Dunay mga taho nga si Pacquiao gihaylo og $38 million (P1.8 billion) aron moaway didto sa tunga-tungang sidlakan partikular na sa Dubai.
Ang maong lakang ni Koncz hingpit nga mi-knockout sa orihinal nga plano ni Arum nga paawayon sunod si Pacquiao batok ni Jeff Horn didto sa Brisbane, Australia. (BANAT NEWS)
- Latest
